غیر ملکی خبر رساں ایجنسی کے مطابق میٹا کے چیف ایگزیکٹو مارک زکربرگ نے آئرلینڈ میں 19ویں صدی کا تاریخی Strancally Castle خرید لیا، جس کے ساتھ تقریباً 440 ایکڑ وسیع اراضی بھی شامل ہے۔
رپورٹس کے مطابق زکربرگ نے تاریخی محل اور اس سے منسلک زمین کے لیے تقریباً 2 کروڑ 30 لاکھ سے 3 کروڑ 50 لاکھ ڈالر ادا کیے، جو پاکستانی کرنسی میں تقریباً 6 ارب 38 کروڑ سے 9 ارب 70 کروڑ روپے بنتے ہیں۔
دریا کے کنارے واقع اس محل کے اطراف وسیع سرسبز اراضی موجود ہے۔ تاریخی عمارت میں کم از کم 11 بیڈ رومز، ٹاورز میں چار کمرے، لائبریری، ڈائننگ روم اور ڈرائنگ روم شامل ہیں۔
میٹا کے ترجمان کے مطابق مارک زکربرگ اور ان کا خاندان تاریخی رہائش گاہ کی دیکھ بھال جاری رکھے گا۔ زکربرگ آئرلینڈ میں وقت گزارنے کے خواہش مند ہیں، جہاں میٹا کا بین الاقوامی ہیڈکوارٹر بھی موجود ہے۔
رپورٹس کے مطابق زکربرگ نے یہ جائیداد ایک سرمایہ کار سے خریدی ہے جو گزشتہ 25 برس سے اپنے خاندان کے ہمراہ یہاں مقیم تھا۔
یہ رواں سال زکربرگ کی دوسری بڑی جائیداد کی خریداری ہے۔ اس سے قبل انہوں نے امریکی شہر میامی میں تقریباً 17 کروڑ ڈالر مالیت کا گھر بھی خریدا تھا۔