کھیلوں کی خبریں

آئی سی سی رینکنگ میں بابر اعظم کی تیسری پوزیشن

ورلڈ کپ 2019 میں گروپ میچز کے اختتام پر آئی سی سی کی جانب سے جاری کردہ حالیہ رینکنگ میں پاکستانی کھلاڑیوں کی رینکنگ میں بہتری آئی ہے۔

حالیہ ورلڈ کپ میں نمایاں کارکردگی کا مظاہرہ کرنے پر پاکستانی کھلاڑیوں کی رینکنگ ترقی ہوئی ہے، قومی ٹیم کے بلے باز بابر اعظم بیٹسمینوں کی رینکنگ میں 4 درجے بہتری کے بعد تیسری پوزیشن پر آ گئے جب کہ بائیں ہاتھ کے اوپنر امام الحق تین درجہ بہتری کے بعد 11 ویں نمبر پر پہنچ گئے ہیں۔

بولرز کی رینکنگ کی بات کی جائے تو فاسٹ بولر محمد عامر حالیہ ورلڈ کپ میں 17 وکٹیں لے کر 28 درجہ بہتری کے بعد 12 ویں پوزیشن پر آگئے ہیں۔ اس کے علاوہ شاہین شاہ آفریدی 34 درجے بہتری کے بعد 23 ویں نمپر پر پہنچ گئے۔

بیٹسمینوں کی ون ڈے رینکنگ میں پہلی دونوں پوزیشنز پر بھارتی کھلاڑیوں کا قبضہ ہے، بھارتی کپتان ویرات کوہلی 891 پوائنٹس کے ساتھ سرفہرست ہیں جب کہ رواں ورلڈ کپ میں 5 سنچریاں اسکور کرنے والے روہت شرما صرف 5 پوائنٹس کی کمی سے دوسرے نمبر پر ہیں۔

آئی سی سی رینکنگ میں بابر اعظم کی تیسری پوزیشن

بولرز کی فہرست میں بھارت کے ہی جسپریت بھمراہ پہلے نمبر پر ہیں جب کہ نیوزی لینڈ کے ٹرینٹ بولٹ دوسرے نمبر پر ہیں۔

اگر آل راؤنڈرز کی ون ڈے رینکنگ کی بات کی جائے تو بنگلا دیش کے شکیب الحسن بیٹنگ اور بولنگ میں شاندار پرفارمنس کے بعد بدستور پہلے نمبر پر براجمان ہیں جب کہ انگلینڈ کے بین اسٹوکس 9 درجے بہتری کے بعد دوسری پوزیشن پر آ گئے ہیں۔

Related Articles

Back to top button