نواز شریف کا ضمانت پر لندن جانے اور پھر واپس نہ آنے کے معاملے پر رہنما فواد چوہدری نے شہباز شریف کیخلاف سپریم کورٹ میں درخواست دائر کردی۔
پی ٹی آئی رہنماء فواد چوہدری کی درخواست میں وزیراعظم شہباز شریف اور ریاست کو فریق بنایا گیا ہے جبکہ لاہور ہائیکورٹ کو کیس میں فریق بنانے کا حکم دینے کی استدعا کی گئی ہے۔
فواد چوہدری نے درخواست میں مؤقف اختیار کیا کہ شہباز شریف نواز شریف کی خرابی صحت کے باعث بیرون ملک جانے کے ضامن تھے۔ اُنہوں نے بطور ضامن نواز شریف کو ملک واپس لانا تھا لیکن اس کے برعکس نواز شریف کو سفارتی پاسپورٹ جاری کر دیا۔
نواز شریف اس وقت مفرور مجرم ہیں۔ فواد چوہدری نے درخواست میں کہا کہ لاہور ہائیکورٹ نے کیس میں فریق بننے کی میری درخواست مسترد کردی۔ لاہور ہائیکورٹ کو حکم دیا جائے کہ نواز شریف کے بیرون ملک جانے کے اجازت نامے سے متعلق کیس میں مجھے فریق بنایا جائے۔