ہتھکڑیاں چوم کر آزادی کا پیغام دیں گے: فواد چوہدری
سماجی رابطے کی ویب سائٹ ٹوئٹر پر جاری بیان میں فواد چوہدری کا کہنا ہے کہ پی ٹی آئی خیبر پختونخوا کی قیادت آج پشاور میں گرفتاری دیں گے، ہتھکڑی کو چوم کر آزادیوں کا پیغام دیں گے، پشاور بھی مہنگائی کے خلاف گرفتاری کی تحریک کیلئے باہر نکلے گا۔
#جیل_بھرو__زندان_بھرو تحریک کا دوسرا دن آج پشاور کے نام،تحریک انصاف خیبر پختونخواہ کی قیادت اور کارکنان آج پشاور میں گرفتاریاں دیں گے،ہتھکڑی کو چوم کر آزادیوں کا پیغام دیں گے، انشاللہْ لاہور کی طرح پشاور بھی انصاف کیلئے اور مہنگائ کے خلاف گرفتاریوں کی اس تحریک کیلئے باہر نکلے گا
— Ch Fawad Hussain (@fawadchaudhry) February 23, 2023
واضح رہے جیل بھرو تحریک کے دوسرے روز آج پشاور سے پی ٹی آئی کے کارکنان جیل بھرنے کیلئے نکلیں گے، پشاور سے کارکنان کے ہمراہ گرفتاریاں پیش کرنے والے قائدین کے نام جاری کردیے گئے۔
گرفتاریاں پیش کرنے والوں کے نام جیل بھرو تحریک کے فوکل پرسن سینیٹر اعجاز احمد چودھری کی جانب سے پیش کئے گئے ہیں، سابق گورنر پختونخوا شاہ فرمان، اور سابق صوبائی وزراء عاطف خان، شہرام ترکئی گرفتاریاں دینے والوں میں شامل ہیں، فضل الہٰی، سید محمد اشتیاق اور ارباب وسیم بھی کارکنان کے ہمراہ گرفتاری دیں گے۔
سینیٹر اعجاز چوہدری نے کہا کہ جیل بھرو تحریک میں قیادت اور کارکن ساتھ ساتھ ہیں، آج پشاور میں گرفتار ہونے والے ہزاروں کارکنان کے ساتھ شاہ فرمان،عاطف خان،شہرام خان جیسے قائدین شامل ہیں، اس کے علاوہ فضل الہی، سید محمد اشتیاق اور ارباب وسیم بھی گرفتاریاں پیش کریں گے۔
