پاکستانی خبریں

عدالت نے پولیس کو شہباز گل کی گرفتاری سے روک دیا

سندھ ہائی کورٹ نے قومی اداروں کے خلاف تضحیک آمیز بیان دینے کے کیس میں پولیس کو تحریک انصاف کے رہنما شہباز گِل کی گرفتاری سے روک دیا۔

میڈیا رپورٹس کے مطابق عدالت نے قرار دیا کہ شہباز گِل کو کراچی میں درج 3 مقدمات میں گرفتار نہ کیا جائے۔

عدالتِ نے پولیس کو گرفتاری سے روکنے کے لیے دائر شہباز گِل کی درخواست کی فوری سماعت کی استدعا منظور کر لی۔

وکیل نے عدالت کو بتایا کہ شہباز گِل کے خلاف کراچی کے سرجانی ٹاؤن، بریگیڈ اور رضویہ تھانے میں مقدمات درج ہیں۔

عدالت نے آئی جی سندھ و دیگر کو 12 جنوری کے لیے نوٹسز جاری کر دیے۔

شہباز گِل کے وکیل کا عدالت میں مؤقف ہے کہ شہباز گِل نے سندھ میں درج مقدمات کالعدم قرار دینے کے لیے درخواست دائر کر رکھی ہے۔

وکیل نے عدالت سے استدعا کی ہے کہ جب تک درخواست پر حتمی فیصلہ نہیں ہو جاتا، پولیس کو شہباز گِل کی گرفتاری سے روکا جائے۔

دوسری جانب عدالت کے باہر پی ٹی آئی رہنما شہباز گِل کے وکیل ظہور محسود ایڈووکیٹ نے میڈیا سے گفتگو کے دوران بتایا کہ عدالت نے کیس کے فیصلوں تک شہباز گِل کی گرفتاری سے روک دیا ہے۔

Related Articles

Back to top button