سرحدی اشتعال انگیزی پر بھارتی ڈپٹی ہائی کمشنر کی دفتر خارجہ طلبی

بھارتی ڈپٹی ہائی کمشنر گورواہلوالیہ کو دفتر خارجہ طلب کر کے احتجاجی مراسلہ تھمایا گیا اور پاکستان کی جانب سے بھارتی فوج کی طرف سے جنگ بندی معاہدے کی خلاف ورزی کی شدید الفاظ میں مذمت کی گئی۔

ترجمان دفتر خارجہ کی جانب سے کہا گیا کہ گزشتہ روز لائن آف کنٹرول کے تتہ پانی سیکٹر پر بھارتی فوج کی بلااشتعال گولہ باری اور فائرنگ سے 2 شہری شہید اور ایک بچہ زخمی ہوا تھا۔

ترجمان نے بتایا کہ بھارت مسلسل جنگ بندی معاہدے کی خلاف ورزی کر رہا ہے، جنگ بندی معاہدے کی خلاف ورزی سے علاقائی امن کو خطرہ ہے۔

دفتر خارجہ کی جانب سے جاری بیان میں کہا گیا کہ بھارتی فوج ایل او سی اور ورکنگ باؤنڈری پر شہری آبادی کو نشانہ بنا رہی ہے۔