بارش اور کورونا اشیائے ضروریہ کی قیمتوں میں اضافے کی وجہ قرار

نیشنل پرائس مانیٹرنگ کمیٹی نے حالیہ بارشوں اور کورونا کو اشیائے ضروریہ کی قیمتوں میں اضافے کی وجہ قرار دے دیا۔

مشیر خزانہ عبدالحفیظ شیخ کی زیر صدارت نیشنل پرائس مانیٹرنگ کمیٹی کااجلاس ہوا جس میں اشیائے ضروریہ کی دستیابی اور قیمتوں پر تفصیلی بات چیت کی گئی۔

اجلاس کے بعد جاری اعلامیہ میں کہا گیا ہے کہ گندم، چینی، ٹماٹر، پیاز،آلو، چکن و دیگر اشیاکی قیمتوں پر بات چیت کی گئی جب کہ ضروری اشیاکی قیمتوں پرکنٹرول،دستیابی یقینی بنانےکیلئےتجاویز کاتبادلہ خیال کیا گیا۔

مشیر خزانہ نے ہدایت کی کہ صارفین کو ریلیف دینےکیلئے ہر ممکن اقدامات یقینی بنائےجائیں، متعلقہ وزارتیں بڑھتی قیمتوں پرکنٹرول کیلئےاقدامات کریں۔

اعلامیہ میں کہا گیا ہے کہ حالیہ بارشوں اور کورونا کےباعث قیمتوں میں بڑا اضافہ ہوا، گندم درآمدجاری، 1.8 ملین ٹن گندم درآمدکی جارہی ہے، چینی کے نومبر تک کی ضروریات کیلئے ذخائر موجود ہیں۔

مشیرخزانہ نے یوٹیلیٹی اسٹورز پر اشیا کی فراہمی کے تسلسل کیلئے اقدامات کی ہدایت کرتے ہوئے کہا کہ صارفین کو ریلیف دینےکیلئے ہر ممکن اقدامات یقینی بنائےجائیں۔

اس خبر پر اپنی رائے کا اظہار کریں