ماہرہ خان کی ’شبانہ‘ فیم اونیجا اینڈریو کے ساتھ ویڈیو وائرل

اداکارہ ماہرہ خان ان دنوں عیدالاضحیٰ پر ریلیز ہونے والی اپنی نئی مزاحیہ فلم ’لو گرو‘ کی بین الاقوامی پروموشن کے سلسلے میں امریکا میں مصروف ہیں، وہ اس دوران ہیوسٹن، ڈیلاس سمیت مختلف شہروں میں فلم کی پروموشن کرتی نظر آئیں گی۔ حال ہی میں ماہرہ خان کو نیویارک میں فلم کی پروموشن کے دوران دیکھا گیا، جہاں ان کی امریکی خاتون اونیجا اینڈریو رابنسن سے ملاقات کی ایک ویڈیو سوشل میڈیا پر وائرل ہو گئی۔

اونیجا اینڈریو نیویارک میں منعقدہ ’لو گرو‘ کے پروموشن ایونٹ میں شریک ہوئیں، جہاں ان کی ماہرہ خان سے ملاقات ہوئی۔ بعدازاں ماہرہ خان نے انسٹاگرام پر اونیجا کے ہمراہ ایک اسٹوری شیئر کی، جس میں انہوں نے اونیجا کا مشہور ڈائلاگ ”آئی لو شبانہ“ کا ریمیک بھی کیا۔

واضح رہے کہ اونیجا اینڈریو رابنسن 2024 کے اختتام پر ایک پاکستانی لڑکے کی مبینہ محبت میں پاکستان آئی تھیں، جہاں وہ چند ماہ قیام کے بعد فروری کے اختتام پر واپس امریکا روانہ ہوگئی تھیں۔ امریکا پہنچنے کے بعد انہوں نے ایک انٹرویو میں سندھ پولیس کی خاتون افسر شبانہ جیلانی کے لیے نیک خواہشات کا اظہار کرتے ہوئے ان کی دل کھول کر تعریف کی۔

اونیجا کا کہنا تھا کہ شبانہ نہایت اچھی پولیس افسر تھیں، جنہوں نے ان کی خدمت اور دیکھ بھال میں کوئی کسر نہ چھوڑی۔

انٹرویو کے دوران اونیجا نے اپنا وائرل ہونے والا ڈائلاگ ’آئی لو شبانہ‘ بھی دہرایا۔ یہ ڈائلاگ سوشل میڈیا پر بے حد وائرل ہوا، جس پر ٹک ٹاکرز کی جانب سے درجنوں ویڈیوز بھی بنائی گئیں۔