لیجنڈ فٹبالر ڈیگو میراڈونا کے سرجن کیخلاف چھان بین شروع

عالمی خبر رساں ادارے کے مطابق ارجنٹائن حکومت نے 60 سالہ عالمی شہرت یافتہ سابق فٹبالر ڈیگو میرا ڈونا کی موت غفلت کے نتیجے کے باعث ہونے کے شبے میں تفتیش کا آغاز کردیا گیا ہے اور اس سلسلے میں دو ہفتے قبل لیجنڈ فٹبالر کے دماغ کی شریان میں اسٹنٹ ڈالنے والے سرجن لیئوپولڈو لُوک سے پوچھ گچھ بھی کی گئی۔

ارجنٹائن کی پراسیکیوشن محکمےکے مطابق سرجن لیئوپولڈو لُوک کی رہائش گاہ اور کلینک کی تلاشی لی گئی ہے۔ تفتیش کے دوران ڈاکٹر لُوک نے بتایا کہ میراڈونا کے دماغ کی ایک شریان میں خون جم گیا تھا جس کا آپریشن کرنا ضروری تھا۔

میراڈونا کے وکیل ماریاس مورلا کی جانب سے لیجنڈ فٹبالر کی موت کی وجہ فوری طبی امداد کی فراہمی میں مجرمانہ غفلت اور ایمبولینس کی تاخیر سے آمد کو قرار دیئے جانے پر ارجنٹائن نے 3 پراسیکیوٹرز پر مشتمل کمیٹی تشکیل دیدی تھی.