کھیلوں کی خبریں

پی سی بی کا ڈومیسٹک کرکٹ‌‌ کیلئے کورونا پروٹوکولز جاری

پاکستان کرکٹ بورڈ (پی سی بی) نے ڈومیسٹک کرکٹ کے کورونا پروٹوکولز جاری کردئیے۔

پاکستان کرکٹ بورڈ کی جانب سے جاری کردہ پروٹوکولز کے مطابق فرسٹ، سیکنڈ الیون کے کھلاڑیوں کی کورونا ٹیسٹنگ 18 اور 21 ستمبر کو ہوگی۔

پی سی بی کے جاری کردہ اعلامیے کے مطابق کھلاڑیوں کی تفریح کے لیے ایک کمرہ مختص ہوگا جہاں تمام سہولت ہوگی، بائیو سیکیور ببل توڑنے والے فرد کو 5 روز (میں 2 کوویڈ19 ٹیسٹ منفی آنے) تک سیلف آئسولیشن میں رہنا ہوگا۔

کرکٹ بورڈ کے مطابق کھلاڑی، اسپورٹ اسٹاف، میچ ریفریز، امپائرز، ڈیوٹی ڈاکٹرز، سیکورٹی منیجرز اور بس ڈرائیورز بائیو سیکیور ببل میں رہیں گے، گراؤنڈ اسٹاف، وینیو منیجرز، اسکوررز اور دیگرعہدیداران کو بائیو سیکیور زون کی دوسری تہہ میں رکھا جائے گا۔

دوسری جانب پاکستان کرکٹ بورڈ نے نیشنل ٹی 20 اور قائد اعظم ٹرافی کے لیے میڈیا پروٹوکولز کا بھی اعلان کیا ہے۔

واضح رہے کہ نیشنل ٹی 20 کپ سے قبل کھلاڑیوں کے فٹنس ٹیسٹ کا سلسلہ جاری ہے، جس کھلاڑی کا پہلا کورونا ٹیسٹ منفی آئے گا وہ ٹیم کو جوائن کرسکے گا۔

یاد رہے کہ نیشنل ٹی 20 کپ 30 ستمبر سے ملتان اور راولپنڈی میں کھیلا جائے گا، پہلے میچ میں سینٹرل پنجاب اور سدرن پنجاب کی ٹیمیں مدمقابل آئیں گی، دونوں ٹیموں کے کپتان بابر اعظم اور عماد وسیم کاؤنٹی کھیلنے کے سبب پہلے راؤنڈ میں دستیاب نہیں ہوں گے، دونوں کھلاڑی دوسرے راؤنڈ میں دستیاب ہوں گے۔

Related Articles

Back to top button