پاکستانی خبریں

عمران خان اسمبلیاں توڑنے کا رسک نہیں لیں گے: یوسف رضا گیلانی

پاکستان پیپلزپارٹی کے مرکزی رہنما اور سابق وزیر اعظم سینیٹر سید یوسف رضا گیلانی نے دعویٰ کیا ہے کہ عمران خان اسمبلیاں توڑنے کا رسک نہیں لیں گے، وہ بخوبی جانتے ہیں کہ اسمبلیاں ٹوٹیں تو صرف دو صوبوں میں الیکشن ہوں گے۔

انہوں نے ذرائع ابلاغ سے بات چیت کرتے ہوئے کہا کہ عمران خان نے الیکشن کرانے کا ہمارا مطالبہ نہیں مانا تو ہم کیسے مانیں؟ عمران خان بات کرنا چاہتے ہیں تو غیر مشروط طور پر بیٹھیں تاکہ کوئی راستہ نکلے۔

سید یوسف رضا گیلانی نے ایک سوال کے جواب میں کہا کہ جو وزیراعلیٰ ایک ایف آئی آر درج نہیں کروا سکا وہ اسمبلی کیسے توڑے گا؟ عمران خان کا جھوٹ پر مبنی بیانیہ بے نقاب ہوچکا ہے، پی ٹی آئی نے پیپلزپارٹی اورن لیگ کے خلاف میڈیا ٹرائل کیا۔

سابق وزیراعظم نے کہا کہ جب ان کی باری آئی ہے تو کہتے ہیں فوری الیکشن ہو جائیں، ہم نے چھوٹے چھوٹے کیسز میں 10،10 سال قید بھگتی ہیں، ان کے تو بڑے بڑے کیسز ہیں اس لیے خوفزدہ ہیں اور الیکشن چاہتے ہیں۔

انہوں نے کہا کہ عمران خان کی غلط فہمی ہے کہ الیکشن میں انہیں دو تہائی اکثریت ملے گی، ہماری اتحادی جماعتیں اپنے اپنے علاقوں میں بڑی با اثر ہیں۔

یوسف رضا گیلانی نے ذرائع ابلاغ سے گفتگو کرتے ہوئے پوچھے جانے والے سوال کے جواب میں دعویٰ کیا کہ آئندہ بھی مخلوط حکومت بنے گی، عمران خان حکومت میں نہیں ہوں گے، وہ خود کہہ چکے ہیں کہ غداروں کے ساتھ نہیں بیٹھیں گے۔

Related Articles

Back to top button