پاکستانی خبریں

پاکستان نے تابکار مواد ضبط کرنے کا بھارتی دعویٰ مسترد کردیا

پاکستان نے کراچی پورٹ سے تابکار مادے لوڈ ہونے کی بھارتی رپورٹ مسترد کر دی۔

تفصیلات کے مطابق دفتر خارجہ نے کراچی پورٹ سے ریڈیو ایکٹیو مواد لوڈ کیے جانے کی بھارتی رپورٹ مسترد کر دی، ترجمان نے اس سلسلے میں جاری ایک بیان میں کہا کہ بھارتی پورٹ حکام کی کنٹینر پکڑے جانے کی خبریں بے بنیاد ہیں۔

دفتر خارجہ کے ترجمان عاصم افتخار نے کہا بھارتی میڈیا میں مندرا پورٹ پر مبینہ ریڈیو ایکٹیو مواد پکڑے جانے کی رپورٹس دیکھیں، بھارتی میڈیا کے مطابق شنگھائی کمرشل کنٹینر کراچی سے لوڈ کیے گئے، تاہم بھارتی میڈیا کی تابکاری مواد پکڑنے کی رپورٹس مضحکہ خیز اور جھوٹی ہیں۔

ترجمان نے کہا نیوکلیئر پاور پلانٹ حکام کے مطابق خالی کنٹینر چین واپس بھجوائے جا رہے تھے۔

ترجمان کے مطابق بھارت ایسے الزامات سے پاکستان کو بدنام، اور دنیا کو گمراہ کرنا چاہتا ہے، کنٹینر خالی تھے اور کارگو کے لیے دستاویزات میں غیر خطرناک قرار دیے گئے تھے۔

ترجمان نے بتایا کہ مذکورہ کنٹینر پہلے چین سے ایندھن لے کر کراچی آئے تھے، اور ان میں کے 2، کے 3 نیوکلیئر پاور پلانٹ کے لیے ایندھن آیا تھا، دونوں ایٹمی پاور پلانٹس آئی اے ای اے کے حفاظتی نظام کے تحت چلتے ہیں۔

Related Articles

Back to top button