بھارت فالس فلیگ آپریشن کی غلطی بھی نہ کرے، منہ توڑ جواب دیں گے: وزیراعظم
وزیراعظم عمران خان نے کہا ہے کہ عالمی برداری پر واضح کرتا ہوں کہ بھارت نے فالس فلیگ آپریشن کیا تو پاکستان کا مضبوط جوابی ردعمل آئے گا اور پاکستان منہ توڑ جواب دے گا۔
وزیراعظم عمران خان کا اپنی ٹوئٹ میں خبر دار کیا کہ بھارت فالس فلیگ آپریشن کی غلطی بھی نہ کرے۔
I want to again warn the world community, as India’s internal problems mount, especially economic recession, growing farmers protests & mishandling of COVID 19, the Modi govt will divert from the internal mess by conducting a false flag operation against Pakistan.
— Imran Khan (@ImranKhanPTI) December 20, 2020
انہوں نے لائن آف کنٹرول (ایل او سی) پر اقوام متحدہ (یو این) مبصر گروپ کی گاڑی پر فائرنگ کی شدید مذمت کرتے ہوئے کہا کہ بھارت کی جانب سے یہ قدم عالمی قوانین کی مکمل خلاف ورزی ہے۔
ان کا کہنا تھا کہ بھارتی اقدام عالمی قوانین اور اقوام متحدہ کا احترام نہ کرنا ظاہر کرتا ہے اور پاکستان بھارت کے اس جابرانہ رویے کی شدید مذمت کرتا ہے۔
وزیر اعظم نے کہا کہ بھارت کوکساد بازاری ،کسانوں کے احتجاج اور کورونا کے مسائل کا سامنا ہے، مودی حکومت اندرونی مسائل سے توجہ ہٹانے کیلئے پاکستان کے خلاف فالس فلیگ آپریشن کرسکتی ہے اور مودی حکومت کی کسی بھی ممکنہ حرکت سے عالمی برادری کو آگاہ کر رہا ہوں۔
ان کا کہنا ہے کہ صرف اس سال بھارت نے ایل او سی اور ورکنگ باؤنڈری کی 3 ہزار خلاف ورزیاں کیں، بھارت نے جان بوجھ کر شہریوں کو بلااشتعال فائرنگ کا نشانہ بنایا۔
خیال رہے کہ گذشتہ روز بھارتی فوج نے اقوام متحدہ کے مبصرین اور ان کی گاڑی کو اس وقت جان بوجھ کرنشانہ بنایا جب وہ آزاد کشمیر کے گاؤں میں بھارتی فائرنگ کے متاثرین سے ملنے جا رہے تھے۔