مریم اورنگزیب نے منڈی بہاؤالدین جلسے کو لیکر وزیراعظم کو نشانے پر رکھ لیا

منڈی بہاؤالدین میں ضلعی انتظامیہ کی جانب سے سیاسی قوت کا مظاہرہ کرنے کی اجازت نہ ملنے پر ترجمان ن لیگ مریم اورنگزیب سیخ پا ہو گئی۔

مریم اورنگزیب نے وزیراعظم عمران خان کو تنقید کا نشانہ بناتے ہوئے انہی کے بیان کا حوالہ بھی دے ڈالا، کہتی ہیں آپ تو کہتے تھے کہ آپ موت بھی برداشت کر سکتے ہیں، تو مریم نواز سے اتنا ڈر گئے کہ جلسہ گاہ میں پانی چھوڑ دیا۔

مریم اورنگزیب نے مریم نواز کی زبان بولتے ہوئے براہ راست وزیراعظم کو مخاطب کرتے ہوئے کہا کہ جلسہ تو ہو کر رہے گا۔ یہ نواز شریف کے شیر ہیں۔ ملک کو ایک سو بیس روز تک بند کرنے والے مریم نواز سے اتنا خوف کیوں کھا رہے ہیں۔ پارلیمنٹ اور پی ٹی وی پر حملہ کرنے والا اب جلسے کی اجازت نہیں دے رہا۔