پاکستان سول ایوی ایشن اتھارٹی ملک بھر کے ہوائی اڈوں پر یوم سیاہ منائے گی

پاکستان سول ایوی ایشن اتھارٹی ملک بھر کے ہوائی اڈوں پر یوم سیاہ منائے گی

کشمیر یوں کے ساتھ اظہار یک جہتی کے طور پر پاکستان سول ایوی ایشن اتھارٹی ملک بھر کے ہوائی اڈوں پر یوم سیاہ منائے گی۔

27 اکتوبر کو ملک بھر میں یوم سیاہ کشمیر کے طور پر منایا جائے گا، اس سلسلے میں ترجمان سی اے اے سعد بن ایوب نے بتایا کہ ایئر پورٹس پر بھی خصوصی طور پر یوم سیاہ منایا جائے گا۔

سی اے اے کا کہنا ہے کہ ملک کے چھوٹے بڑے ہوائی اڈوں پر بینرز اور ہورڈنگز کی نمائش کی جائے گی، تمام لاؤنجز میں یوم سیاہ کشمیر کی مناسبت سے دستاویزی فلمیں بھی دکھائی اور گیت بجائے جائیں گے۔

واضح رہے کہ مقبوضہ کشمیر میں بھارت کے جابرانہ قبضے کو 73 برس بیت گئے ہیں، پاکستان سمیت دنیا بھر میں بسنے والے کشمیری اس تناظر میں 27 اکتوبر کو یوم سیاہ کشمیر مناتے ہیں

73 برس قبل 27 اکتوبر 1947 کو بھارت نے پہلی بار مقبوضہ کشمیر میں اپنی فوجیں اتاری تھیں جس کے بعد سے بھارت نے آج تک کشمیر کے ایک بڑے حصے پر جابرانہ قبضہ قائم کر رکھا ہے۔

اس دن کی مناسبت سے آزاد کشمیر، مقبوضہ کشمیر اور پاکستان سمیت دنیا بھر میں مقیم کشمیری بھارت کی جانب سے قبضے کے خلاف یوم سیاہ منائیں گے۔

اس خبر پر اپنی رائے کا اظہار کریں