کراچی میں کورونا وائرس کے باعث مزید 73 اموات رپورٹ، مجموعی تعداد 1125 ہوگئی

محکمہ صحت سندھ کے مطابق کورونا وائرس سے ضلع شرقی میں ایک روز میں سب سے زیادہ 36 اموات رپورٹ ہوئیں ہیں جبکہ ضلع وسطی میں 16، کورنگی میں 5 اور ملیرمیں 4 اموات ہوئی ہیں۔

بتایا گیا ہے کہ عالمی وبا سے ضلع جنوبی اور ضلع غربی میں 6 ، 6 اموات رپورٹ ہوئیں ہیں۔

خیال رہے کہ پاکستان میں گزشتہ 24 گھنٹوں کے دوران کورونا کے سبب مزید 49 اموات رپورٹ ہوئیں جس کے بعد اموات کی مجموعی تعداد 4 ہزار 167 ہو گئی ہے۔

ملک بھر سے کورونا وائرس کے مزید 3 ہزار 557 کیسز رپورٹ ہوئے جس کے بعد متاثرہ افراد کی تعداد 2 لاکھ 6 ہزار 512 ہو گئی۔

نیشنل کمانڈ اینڈ آپریشن سنٹر کی جانب سے جاری کیے گئے اعدادوشمار کے مطابق ملک بھر میں کورونا سے متاثرہ 95 ہزار 407 مریض صحت یاب ہو گئے۔

پاکستان کے صوبہ پنجاب میں کورونا کے اب تک 74 ہزار 778 کیسز رپورٹ ہو چکے ہیں۔ سندھ میں 80 ہزار 446، خیبرپختونخوا میں 25 ہزار 778، بلوچستان میں 10 ہزار 376، اسلام آباد میں 12 ہزار 643، آزادکشمیر میں ایک ہزار 49 اور گلگت بلتستان میں ایک ہزار 442 کیسز رپورٹ ہو چکے ہیں۔

کورونا وائرس کے باعث سب سے زیادہ اموات پنجاب میں ہوئی ہیں جہاں ایک ہزار 681 افراد جان کی بازی ہار چکے ہیں۔ سندھ میں ایک ہزار 269، خیبر پختونخوا میں 922، اسلام آباد میں 127، گلگت بلتستان میں 24، بلوچستان میں 116 اور آزاد کشمیر میں 28 افراد کورونا وائرس سے جاں بحق ہو چکے ہیں۔

ملک بھر میں 24 گھنٹوں کے دوران 23 ہزار نو ٹیسٹ کیے گئے جب کہ مجموعی طور پر 12 لاکھ 62 ہزار 162 ٹیسٹ کیے جا چکے ہیں۔

وزیر اعظم عمران خان کا کہنا ہے کہ آنے والے دنوں میں پاکستان میں کورونا کیسز میں مزید اضافہ ہوگا اور اموات بھی بڑھیں گیں۔