کورونا لاک ڈاون کے حوالے سے وزیراعلیٰ سندھ اہم پریس کانفرنس کریں گے، آئندہ کا لائحہ عمل طے ہوگا

سندھ میں لاک ڈاؤن میں مزید نرمی کے لئے سندھ حکومت سرجوڑکر بیٹھے گی، جس کے بعد وزیراعلیٰ سندھ مراد علی شاہ آج پریس کانفرنس کے ذریعے آئندہ کے لائحہ عمل کا اعلان کریں گے۔

تفصیلات کے مطابق وزیراعلیٰ سندھ مراد علی شاہ نے اہم وزرا کو وزیراعلیٰ ہاؤس طلب کرلیا ، اجلاس میں وفاقی حکومت کی جانب سےلاک ڈاؤن میں نرمی لانے اور تاجروں کو ریلیف دینے کیلیے مختلف کاروبارمیں نرمی لانے غور کیا جائے گا۔

وزیراعلیٰ مرادعلی شاہ نےپارٹی قیادت سےمشاورت مکمل کرلی ہے جبکہ بلاول بھٹو نےوزیراعلیٰ سندھ کوضروری ہدایات دے دی۔ ذرائع کا کہنا ہے کہ حکومت سندھ کہہ چکی ہے لاک ڈاؤن کو ختم نہیں کیا جائے گا تاہم ایس اوپیزکےتحت مشروط کاروبار کھولنے کی اجازت دی جاسکتی ہے۔

وزیراعلیٰ آج پریس کانفرنس کے ذریعے آئندہ کے لائحہ عمل کا اعلان کریں گے۔

یاد رہے گذشتہ روز وزیراعظم عمران خان نے ہفتے سے لاک ڈاؤن ختم کرنے کا اعلان کیا تھا اور کہا تھا کہ صوبے اپنے فیصلے خود کریں، وقت آگیا ہے ذمہ دارشہری بن کرکورونا کامقابلہ کریں۔

بعد ازاں وزیر اطلاعات سندھ ناصر حسین شاہ کا کہنا تھا کہ وزیراعظم عمران خان نےآج اتفاق رائےکےتحت فیصلہ کیاہے، کچھ چیزوں میں سندھ حکومت کواختیارات دیئےگئےہیں، سندھ حکومت اپنےایس اوپیزبنائےگی اوراس پرعمل کرائے گی۔

وزیراعلیٰ سندھ لاک ڈاؤن پرعوام کواعتمادمیں لیں گے، وزیراعلیٰ اورکابینہ متفق ہےکہ پہلےعوام کی زندگی پھرکاروبار، کاروبارکو مرحلہ وار کھولنے کیلئے ایس او پیز پر کام کررہے ہیں، وفاق اور صوبے جس پر متفق ہیں وہ کاروبار کھولاجائے گا۔

اس خبر پر اپنی رائے کا اظہار کریں