وزیر خارجہ شاہ محمود قریشی 3 روزہ دورے پر امریکا روانہ

وزیر خارجہ شاہ محمود قریشی 3 روزہ دورے پر امریکا روانہ ہو گئے ہیں۔

تفصیلات کے مطابق شاہ محمود قریشی نیویارک میں امریکی دورے کے دوران اقوام متحدہ کے سیکریٹری جنرل انتونیو گوتریس اور جنرل اسمبلی کے صدر تجانی محمد سے ملاقات کریں گے۔

ترجمان دفترخارجہ کا کہنا ہے کہ وزیر خارجہ شاہ محمود 15 تا 17 جنوری واشنگٹن اور نیویارک کے دورے پر ہوں گے، وہ آج سیکریٹری جنرل سمیت یو این قیادت سے ملاقات کریں گے، جب کہ 17،16 جنوری کو واشنگٹن میں امریکی ہم منصب مائیک پومپیو سے ملاقات ہوگی۔

وزیر خارجہ کی عمان کے نئے سلطان سے ملاقات، سلطان قابوس کے انتقال کی تعزیت

وزیر خارجہ امریکی قومی سلامتی کے مشیر رابرٹ اوبرائن اور دیگر حکام سے بھی ملاقاتیں کریں گے۔

دفتر خارجہ کے مطابق وزیر خارجہ کے دورۂ امریکا کا مقصد مشرق وسطیٰ میں جاری کشیدگی میں کمی کی کوشش ہے، شاہ محمود قریشی امریکی حکام کے ساتھ ملاقاتوں میں مقبوضہ کشمیر کی صورت حال اور کشمیریوں پر بھارتی مظالم سے بھی آگاہ کریں گے۔

یاد رہے کہ گزشتہ روز وزیر خارجہ دورۂ عمان مکمل کر کے واپس وطن پہنچے تھے، انھوں نے اپنے دورہ کے دوران عمان کے سلطان ہیثھم بن طارق السید سے ملاقات کی اور ان کے ساتھ وزیر اعظم عمران خان اور پاکستانی قوم کی طرف سے سابق فرماں روا سلطان قابوس کے انتقال پر اظہار تعزیت کیا۔

اس خبر پر اپنی رائے کا اظہار کریں