امن کے لیے ہماری خواہش کو کمزوری نہ سمجھا جائے۔ آرمی چیف کا ایل او سی کا دورہ
پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ نے لائن آف کنٹرول (ایل او سی) کا دورہ کیا اور سرحد پر تعینات جوانوں اور افسروں سے بھی ملاقات کی۔
اس دوران آرمی چیف جنرل قمر جاوید باجوہ کا کہنا تھا کہ امن کے لیے ہماری خواہش کو کمزوری نہ سمجھا جائے۔
COAS visited LOC, CMH Mzd. “Our quest for peace must never be misconstrued as weakness. There will never be a compromise on Kashmir whatever the cost. We are capable & fully prepared to thwart any misadventure/aggression for defence of our motherland”, COAS. pic.twitter.com/R0vUCzYD0q
— DG ISPR (@OfficialDGISPR) December 23, 2019
نہوں نے کہا کہ کشمیر کے معاملے پر کبھی بھی کسی بھی قسم کا کوئی سمجھوتہ نہیں کیا جائے گا۔
آرمی چیف کا کہنا تھا کہ ہم مادرِ وطن کے دفاع کے لیے مکمل طور پر تیار ہیں، ہم دشمن کے مس ایڈونچر اور جارحیت کو ناکام بنانے کے لیے مکمل تیار اور صلاحیت رکھتے ہیں۔
بعد ازاں آرمی چیف نے مظفر آباد میں سی ایم ایچ کا بھی دورہ کیا اور بھارتی فوج کی فائرنگ سے زخمی شہریوں کی عیادت کی۔
خیال رہے کہ بھارت کی جانب سے لائن آف کنٹرول پر اشتعال انگیزی کا سلسلہ جاری ہے، گزشتہ دنوں بھی دیوا سیکٹر میں پاک فوج کی جوابی کارروائی میں کئی بھارتی چیک پوسٹیں تباہ اور متعدد بھارتی فوجیوں کی ہلاکت کی اطلاعات ہیں۔
دوسری جانب وزیر خارجہ شاہ محمود قریشی نے کہا ہے کہ لائن آف کنٹرول (ایل او سی) پر بھارت کی جانب سے براہموس میزائل اور اسپائیک اینٹی ٹینک میزائلوں کی تنصیب کی اطلاع ہے، یہ سارے عوامل امن و امان کے لیے خطرہ ہیں۔