ڈولفن اہلکار کا جنازہ

نماز جنازہ میں پولیس حکام سمیت اہلکاروں اور شہریوں کی بڑی تعداد نے شرکت کی۔ ڈولفن اہلکار شہید محسن علی کی نماز جنازہ پولیس لائنز قلعہ گجرسنگھ میں ادا کی گئی۔ نماز جنازہ میں آئی جی پنجاب شعیب دستگیر، سی سی پی او ذوالفقارحمید، ڈی آئی جی آپریشنز لاہور رائےبابرسعید، ڈولفن فورس کے اہلکاروں سمیت اہلخانہ و پولیس افسران کی بڑی تعداد شریک ہوئی۔ نمازجنازہ کی ادائیگی کے بعد شہید کو پولیس کے چاک و چوبند دستے نے سلامی پیش کی اور آئی جی پنجاب نے پھولوں کی چادر کی چڑھائی۔ باغبانپورہ پولیس نے دو نامعلوم افراد کے خلاف مختلف دفعات کے تحت مقدمہ درج کر لیا ہے جس میں دہشت گردی کی دفعات بھی شامل ہیں۔ ادھر واقعے کی سی سی ٹی وی فوٹیج بھی سامنے آگئی ہے۔ جس کے ذریعے تحقیقات جاری ہیں۔