ایمنسٹی انٹرنیشنل کی کاوشوں سے دنیا کو کشمیری عوام کی مشکلات کا علم ہوا: وزیراعظم 

دورہ امریکا کے دوران نیویارک میں وزیراعظم عمران خان سے ایمنسٹی انٹرنیشنل کے جنرل سیکریٹری کومی نائیڈو نے ملاقات کی جس میں وزیراعظم عمران خان نے مقبوضہ کشمیر میں انسانی حقوق کی صورتحال سے آگاہ کیا اور بھارت کی جانب انسانی حقوق کی سنگین خلاف ورزیوں کو اجاگر کرنے میں ایمنسٹی انٹرنیشنل کے کردار کو سراہا۔

وزیراعظم نے پیلٹ گنز سے متاثرہ کشمیری نوجوانوں پر ایمنسٹی انٹرنیشنل کی رپورٹ کو سراہتے ہوئے کہا کہ ایمنسٹی انٹرنیشنل کی کاوشوں سے دنیا کو کشمیری عوام کی مشکلات کا علم ہوا، کشمیر پر اقوام متحدہ کی رپورٹس نے کشمیری عوام کے پیغام کی مضبوط بنیاد رکھی۔

اس موقع پر کومی نایڈو نے مقبوضہ کشمیر کی وکالت کے حوالے سے ایمنسٹی انٹرنیشنل کی کوششوں سے وزیر اعظم کو آگاہ کیا، سیکریٹری جنرل نے ماحولیاتی تبدیلی سے متعلق ادارے کے کام کے حوالے سے بھی وزیراعظم کو تفصیلات بتائیں، جنری سیکریٹری نے کہا کہ مقبوضہ کشمیرمیں انسانی حقوق کی تنظیموں کوعوام تک رسائی نہیں دی جارہی اور مقبوضہ کشمیر میں انسانی حقوق تنظیموں کے کام میں رکاوٹیں ڈالی جا رہی ہیں۔