ملک بھرمیں 9 ویں محرم الحرام عقیدت واحترام کے ساتھ منائی جارہی ہے

حضرت امام حسین علیہ السلام اور اُن کے باوفا ساتھیوں کی عظیم قربانی کی یاد میں آج ملک کے چھوٹے بڑے شہروں میں نو محرم الحرام کے جلوس نکالے جائیں گے۔

راولپنڈی کی امام بارگاہ یادگار حسین کمرشل مارکیٹ سے علم کا جلوس برآمد ہوگا جو مقررہ راستوں سے ہوتا ہوا واپس امام بارگاہ یادگار حسین پر اختتام پذیر ہوگا۔

اسلام آباد میں نو محرم کا مرکزی جلوس امام بارگاہ اثنائے عشری G 6/2 سے دوپہرایک بجے برآمد ہوگا جب کہ لاہور میں مرکزی جلوس کچھ دیر میں پانڈو اسٹریٹ اسلام پورہ سے برآمد ہوگا اور روایتی راستوں سے ہوتا ہوا خیمہ سادات امام بارگاہ پر اختتام پزیرہوگا۔

پشاور میں شبیہہ ذوالجناح کاجلوس امام بارگاہ حسینیہ ہال سے 10 بجے برآمد ہوگا جو صدر روڈ، فخرعالم روڈ،کالی باڑی اور چوک فوارہ سے ہوتا ہوا امام بارگاہ حسینیہ ہال پرختم ہوگا۔

کراچی میں مرکزی جلوس نشترپارک سے دوپہر 12 بجے برآمد ہوگا جو پیپلز چورنگی، صدر دواخانہ، پریڈی اسٹریٹ، بولٹن مارکیٹ اور کھارادر سے ہوتا ہوا حسینیاں ایرانیاں امام بارگاہ کھارادر پر اختتام پذیر ہوگا۔

سیکیورٹی انتظامات

ملک بھر محرم الحرام کے جلوس و مجالس کے سلسلے میں سیکیورٹی کے سخت انتظامات کیے گئے ہیں۔

موبائل فون سروس معطل

کراچی سمیت کئی شہروں میں صبح سے ہی موبائل فون سروس معطل رہے گی جب کہ یوم عاشور کو بھی موبائل فون سروس معطل رکھی جائے گی۔

محکمہ داخلہ سندھ نے کراچی سمیت کسی بھی علاقے میں موبائل فون سروسز بند یا کھولنے کا اختیار کمشنر اور ڈی آئی جیز کو دے دیا، کراچی، حیدرآباد، سکھر، نواب شاہ، میرپور خاص اور لاڑکانہ ڈویژن کے افسران کو اختیار تفویض کر دیے گئے ہیں۔

اس خبر پر اپنی رائے کا اظہار کریں