وزارت صحت کا کورونا ویکسین نجی اسپتالوں میں مفت لگائے جانے کا اعلان

وزارت صحت کا کورونا ویکسین نجی اسپتالوں میں مفت لگائے جانے کا اعلان

متحدہ عرب امارات میں وزارت صحت نے اعلان کیا ہے کہ کورونا ویکسین نجی اسپتالوں میں مفت لگائی جائے گی۔

متحدہ عرب امارات میں وزارت صحت کا کہنا ہے کہ کورونا ویکسین کے مفت حصول کے لیے مقامی شہری اور ملک میں مقیم غیرملکی پیشگی اطلاع کے بغیر ویکسین لگوا سکتے ہیں ، ویکسین کے لیے انہیں صرف شناختی کارڈ دکھانا ہوگا۔

وزارت صحت کا کہنا ہے کہ متحدہ عرب امارات کی ریاستوں اور ابوظبی کے کئی نجی اسپتالوں میں کورونا ویکسین کا انتظام کیا گیا ہے۔

سیکریٹری صحت ڈاکٹر حسین الرند نے نجی اسپتالوں کو مفت کورونا ویکسین فراہم کرنے کی ہدایت جاری کرتے ہوئے کہا کہ مقامی شہریوں اور مقیم غیرملکیوں کو انتظار کی زحمت سے بچایا جائے اورشناختی کارڈ دکھانے والے شہریوں کو ویکسین لگائی جائے۔

اماراتی وزارت صحت کی جانب سے نجی اسپتالوں کی فہرست بھی جاری کی گئی ہے جہاں مفت کورونا ویکسین کا بندوبست کیا گیا ہے۔

فہرست کے مطابق شارجہ میں الزھرا اسپتال، زلیخہ اسپتال، پرائیویٹ سینٹرل اسپتال، سعودی جرمن اسپتال، برجیل سپیشلسٹ اسپتال، برایم سپیشلسٹ میڈیکل سینٹر 1، برایم میڈیکل سینٹر النھدۃ، برایم سپیشلسٹ میڈیکل سینٹر، ٹومبائی اسپتال اور میڈ کیئر اسپتال اس کے لیے مختص کیے گئے ہیں۔

اسی طرح عجمان میں امینہ اسپتال، سعودی جرمن اسپتال، برایم میڈیکل سینٹر اے جی ایم، ٹومبائی ایجوکیشنل اسپتال، راس الخیمہ میں راس الخیمہ اسپتال اور الفجیرہ میں ٹومبائی اسپتال پہنچ کر کورونا ویکسین لگائی جاسکتی ہے۔

ڈاکٹر حسین الرند نے بتایا کہ کورونا ویکسین ام القوین کے البیت المتواحد میں بھی مفت مہیا ہوگی اور روزانہ صبح 8 بجے سے رات 10 بجے تک لگوائی جاسکتی ہے جبکہ راس الخیمہ میں ایکسپو سینٹر اور عجمان میں البیت المتواحد میں بھی انتظام کیا گیا ہے۔

اس خبر پر اپنی رائے کا اظہار کریں