شادی ہال میں بم دھماکہ، 5 خواتین جاں بحق ہو گئیں

یمن کے شہر حدیدہ میں ایک شادی ہال میں بم دھماکے سے 5 خواتین جاں بحق ہو گئیں۔

یمن کے ساحلی شہر حدیدہ میں شادی کی ایک تقریب جاری تھی کہ اس دوران ہال میں بم دھماکا ہو گیا، جس کے نتیجے میں پانچ خواتین جاں بحق ہو گئیں۔

بم دھماکہ نئے سال کے پہلے دن ہونے والی شادی کی تقریب کے دوران ہوا، دوسری طرف افسوس ناک واقعے کی ذمہ داری یمن کی حکومت اور حوثی باغی ایک دوسرے پر ڈال رہے ہیں۔

یاد رہے کہ اس سے محض دو دن قبل عدن ایئر پورٹ پر بھی دھماکے ہوئے تھے، جس میں 26 افراد ہلاک ہو گئے تھے، عدن ایئر پورٹ کو دھماکوں سے اس وقت نشانہ بنایا گیا تھا جب حکومتی وزرا وہاں پہنچے تھے۔

شادی ہال بم دھماکے کو اقوام متحدہ کے مشترکہ جنگ بندی کمیشن میں یمنی حکومتی نمائندے جنرل صادق دوئیڈ نے مکروہ جرم قرار دیتے ہوئے کہا کہ یہ حوثی باغیوں کی جانب سے سویلینز کے خلاف مکروم جرم ہے۔

دوسری طرف شہر حدیدہ کے لیے نامزد حوثی گورنر محمد ایاچے نے ایک ٹی وی چینل کو بتایا کہ جارح قوتیں اپنے جرائم کا الزام دوسروں پر دھرنے میں کبھی ہچکچاہٹ کا مظاہرہ نہیں کرتیں۔

اس خبر پر اپنی رائے کا اظہار کریں