کورونا کے بعد منگولیا میں ببونک طاعون کا خطرہ

غیرملکی خبررساں ادارے کی رپورٹ کے مطابق منگولیا میں ببونک طاعون کے تین نئے مشتبہ کیسز سامنے آئے ہیں جس نے پڑوس میں واقع چین کو بھی تشویش میں مبتلا کردیا، حکومت نے اقدامات شروع کردیے۔

رپورٹ کے مطابق منگولیا نے 17 صوبوں کو ببونک سے متعلق خطرناک قرار دے دیا ہے، مذکورہ صوبوں میں مہلک بیماری پھیل سکتی ہے۔ رواں ماہ منگولیا میں طاعون کے دو مریض ہلاک بھی ہوچکے ہیں۔

ماہرین کا ماننا ہے کہ اگر یہ وبا کسی جانور میں ہوئی تو بہ آسانی انسانوں میں بھی منتقل ہوسکتی ہے، اور اگر بروقت علاج کرکے بیماری کا جسم میں پھیلاؤ نہ روکا گیا تو 24 گھنٹے کے اندر متاثرہ شخص مر بھی سکتا ہے۔

واضح رہے کہ ببونک وائرس سے بچنے کے لیے روس نے بھی حکمت عملی تیار کرلی ہے۔ ببونک طاعون کے کیسز اس سے قبل بھی سامنے آتے رہے ہیں۔ سنہ 2017 میں مڈغاسکر میں طاعون کے 300 کیسز سامنے آئے تھے۔