بین الاقوامی

ہیثم بن طارق کے نام سے سکے جاری، سلطان عمان کا بڑا قدم، جانیے تفصیلات

سینٹرل بینک آف عمان نے سلطان عمان ہیثم بن طارق کے نام سے سکے جاری کر دیے۔

تفصیلات کے مطابق عمانی سلطان ہیثم بن طارق کے نام سے نئے سکے بنا دیے گئے جو اگلے ماہ ستمبر میں عوام کے استعمال میں آجائیں گے۔ نئے عمانی سلطان کے لیے 5،10،25 کے کرنسی سکے ڈھالے گئے ہیں۔

سینٹرل بینک آف عمان کے مطابق ان نئے سکوں‌ کے ایک جانب سلطان ہیثم کا نام اور قومی نشان درج ہے جبکہ سکے کے دوسری جانب سکے کی مالیت اور اس کے اجراء کا اسلامی اور عیسوی سال درج ہے۔

واضح رہے کہ عمان کے نئے سلطان ہیثم بن طارق نے سلطنت کا انتظام سنبھالتے ہی چند اہم فیصلے کیے تھے جن کی بناء پر وہ دنیا بھر کی توجہ کا مرکز بن گئے تھے۔ رواں سال فروری میں سلطان ہیثم نے حکم جاری کیا تھا کہ عمان کا قومی ترانہ بدل دیا جائے۔

موجودہ قومی ترانے میں عمان کے مرحوم سلطان قابوس بن سعید سے متعلق الفاظ شامل تھے جنہیں سلطان ہیثم نے بدل کر ان کی جگہ اپنا نام شامل کرنے کا حکم دیا۔

عمانی سلطان نے دوسرا حکم قومی پرچم کے ڈیزائن کو تبدیل کرنے سے متعلق دیا تھا جبکہ تیسرا حکم عمان کے قومی نشان کی تبدیلی کے بارے میں تھا۔

سلطان ہیثم بن طارق نے ایک اور حکم کے تحت مرحوم سلطان قابوس کی جانب سے اختیار کیے گئے القابات کو منسوخ کرنے کی ہدایت کرتے ہوئے حکم نامے میں کہا تھا کہ وہ سابق حکمرانوں کے ساتھ استعمال ہونے والے تمام القابات منسوخ کر رہے ہیں۔

اس حکم نامے میں کہا گیا تھا کہ آئندہ انہیں کوئی ’السطان المعظم‘ یا ’اعلیٰ حضرت‘ کہہ کر مخاطب نہیں کرے گا۔مستقبل میں ہونے والی تمام سرکاری خط کتابت اور دیگر اہم سفارتی موقعوں اور بات چیت میں ان کے لیے صرف سلطان عمان کا نام ہی استعمال ہوگا۔

Related Articles

Back to top button