سعودی عرب: لاپتہ شہری کی لاش حالتِ سجدہ میں مل گئی، ویڈیو وائرل

سعودی عرب میں تین روز سے لاپتہ شہری ذویحی حمود العجالین کی لاش حالت سجدہ میں مل گئی۔

غیر ملکی میڈیا رپورٹ کے مطابق سعودی پولیس کی ایک امدادی ٹیم کو ذویحی حمود العجالین نامی 40 سالہ شہری کی لاش صوبہ الریاض میں واقع ایک صحرا کے وسط سے ملی ہے۔

سوشل میڈیا پر وائرل ہونے والی ویڈیوز میں ذویحی حمود العجالین کی ڈبل کیبن کار پر لکڑیوں کا بنڈل دیکھا جاسکتا ہے، صارفین کی جانب سے اندازہ لگایا جارہا ہے وہ صحرا میں لکڑیاں اکٹھی کرنے گئے تھے۔

سوشل میڈیا پر یہ ویڈیو بڑے پیمانے پر شیئر کی جارہی ہے اور لوگ ان کی مغفرت کی دعائیں کر رہے ہیں۔

تین روز قبل لاپتہ ہونے والے 40 سالہ ذویحی حمود العجالین کا تعلق الریاض کے علاقے وادی الدواسر سے ہے، وہ گزشتہ جمعرات کو اپنے گھر سے نکلے تھے اور لاپتہ ہوگئے تھے۔

رپورٹس کے مطابق کار سے چند میٹر کے فاصلے پر لق ودق صحرا میں ذویحی حالت سجدہ میں پائے گئے اور دوران نماز ہی کسی وقت ان کی روح قبض ہوگئی۔

اس خبر پر اپنی رائے کا اظہار کریں