بین الاقوامی

نومولود بچے نے تڑپ کر جان دے دی، والدین 12 گھنٹے تک بے خبر

امریکا میں ایک جوڑے نے اپنے 6 ماہ کے بچے کو بند کار میں چھوڑ دیا، 12 گھنٹے بعد بچے کی لاش برآمد ہونے پر پولیس نے جوڑے کو گرفتار کرلیا۔

مذکورہ واقعہ دو روز قبل امریکی ریاست کینٹکی کے شہر کوونگٹن میں پیش آیا۔ پولیس کے مطابق 21 سالہ سٹلین اور 22 سالہ الیگزنڈر رات ساڑھے 11 بجے اپنے گھر پہنچے، کار پارک کی اور اپنے 6 ماہ کے بچے کو کار کے اندر ہی چھوڑ دیا۔

پولیس کا کہنا ہے کہ گھر کے اندر جا کر جوڑا حشیش پینے لگا۔ 12 گھنٹے بعد یعنی اگلی صبح جوڑے نے کار میں جا کر دیکھا تو بچہ بے حس و حرکت پڑا تھا۔

بچے کو اسپتال لے جایا گیا تاہم اس میں زندگی کی کوئی رمق باقی نہیں تھی، واقعے کے بعد پولیس نے جوڑے کو گرفتار کرلیا۔ پولیس نے جوڑے پر غفلت برتنے، عمداً قتل اور منشیات رکھنے کا مقدمہ درج کرلیا ہے۔

اس سے قبل ریاست الباما میں بھی والدین نے اپنے 3 سالہ بیٹے کو بھوکا رکھ کر اسے موت کے منہ میں پہنچا دیا تھا۔

بچے کا وزن صرف 13 پونڈز تھا جبکہ اس کا گھر میں موجود 4 سالہ بھائی بھی صرف 15 پونڈز کا تھا۔ پوسٹ مارٹم سے علم ہوا کہ بچہ بھوک سے جاں بحق ہوا۔

والدین کی اس بدترین غفلت کے بعد اب جوڑے کو عمر قید کی سزا ہوسکتی ہے۔

Related Articles

Back to top button